25.07.2011
2011թ-ի Հունիսի 25-ից Հուլիսի 5-ը Դիլիջանի "Լեռնային Հայաստան" հանգստյան տուն- առողջարանում ընթացավ "Օգնեմ" Հիմնադրամի "ՕԳՆԵՄ-2011" վերականգնողական ճամբարը: Ճամբարին մասնակցեցին 15 երեխաներ` մայրերի հետ միասին, ովքեր ավարտել էին հիվանդանոցային բուժումը /ինտենսիվ քիմիաթերապիա/ և կարիք ունեին վերականգնելու իրենց ընդհանուր առողջական ու հոգեբանական վիճակը: Երեխաներն ընտրվել էին Ռ. Հ. Յոլյանի անվան Արյունաբանական կենտրոնից և Մ. Հերացու անվան ՀՊԲՀ "Մուրացան" հիվանդանոցից: Երեխաների ընտրության, ինչպես նաև ճամբարի ընթացքում նրանց առողջության հետ կապված բոլոր հարցերում ճամբարի կազմակերպիչները հետևում էին բժիշկների ցուցումներին և խորհուրդներին: Ճամբարի ծրագիրը նախապես կազմված և մշակված էր հիմնադրամի աշխատակիցների, մանկական հոգեբանի և մանկավարժի կողմից:
Ծրագրում ընդգրկված էին.
- ճանաչողական, ինտելեկտուալ, զարգացնող, սպորտային և ժամանցային խաղեր,
- ստեղծագործական աշխատանք`ձեռքի աշխատանք, նկարչություն, աշխատանք վիտրաժային ներկերով և բնական նյութերով, անհատական պաստառների և մոմերի ձևավորում, դեմքի գունազարդում` դեկորատիվ ներկերով,
- խմբակային և անհատական զրույցներ,
- զբոսանքներ, արշավներ, էքսկուրսիաներ, հյուրընկալվել էր մարիոնետների թատրոնը:
«Օգնեմ» հիմնադրամն իր երախտիքն է հայտնում Զարգացման և համագործակցության Շվեցարական գրասենյակին` ծանր փորձություն անցած երեխաների համար վերականգնողական ճամբարի կազմակերպմանն ու իրականացմանը ցուցաբերած անգնահատելի աջակցության համար համար:
