Բարեգործական ծրագիր և Էդգար Գյանջումյանի հեղինակային երգերին նվիրված միջոցառում Վ.Բրյուսովի անվան պետական լեզվաբանական համալսարանում

30.04.2010
Երևանի Վ. Բրյուսովի անվան պետական լեզվաբանական համալսարանի Ուսանողական խորհուրդը և ՀՀկ երիտասարդական կազմակերպությունը համատեղ կազմակերպել էին ծրագիր` նվիրված արյան քաղցկեղով հիվանդ երեխաներին: Ծրագրին միացել էր նաև «Օգնեմ» հիմնադրամը: Վերոնշյալ ծրագրի շրջանակներում կազմակերպիչները` ժպիտներով, ուրախ տրամադրությամբ ու նվերներով այցելեցին պրոֆեսոր Ռ.Հ. Յոլյանի անվան Արյունաբանական կենտրոնի մանկական բաժանմունք, որտեղ ստացիոնար և դիսպանսեր բուժման մեջ է գտնվում մոտ երեսուն երեխա: Էդգար Գյանջումյանը «Օգնեմ» հիմնադրամի կողմից բոլոր երեխաներին նվիրեց մանկական Աստվածաշնչեր: Մի քանի օր անց, տեղի ունեցավ ևս մեկ նմանատիպ այց: Այս անգամ, նրանք բոլորը միասին այցելեցին ԵՊԲՀ-ի «Մուրացան» համալսարանական հիվանդանոցի քիմիաթերապիայի բաժանմունք: Այնտեղ գտնվում էին մինչև 17 տարեկան 9 հիվանդ երեխա: Նրանց համար նույնպես պատրաստվել էին զանազան անակնկալ նվերներ: Երեխաները շատ էին ոգևորվել նրանց այցելությունից: ՀՀԿ երիտասարդական կազմակերպության նախագահ Կարեն Ավագյանը և ԵրՊԼՀ ՈՒԽ նախագահ Հ. Ափյանը երեխաներին մաղթեցին շուտափույթ ապաքինում,իսկ Էդգար Գյանջումյանը խորհուրդ տվեց հավատալ, աղոթել ու սպասել հրաշքի: Ծրագիրը եզրափակվեց մշակութային ցերեկույթով,որը կայացավ ապրիլի 21-ին, ԵրՊԼՀ մեծ դահլիճում: Ցերեկույթի ընթացքում ԵրՊԼՀ ուսանողները հանդես եկան Էդգար Գյանջումյանի հեղինակային երգերի կատարումներով: Էդգար Գյանջումյանի հեղինակային երգերին նվիրված ցերեկույթին ներկա էին նրա ստեղծած հիթերի կատարողներից երգչուհիներ Նառան եւ Զարուհի Բաբայանը: Ցուցադրվեցին Նունե Եսայանի, Ալլա Լեւոնյանի, Աննա Խաչատրյանի եւ այլ երգչուհիների` ցերեկույթի առթիվ նկարահանված տեսանյութերը: -Նրան սիրում ենք որպես կոմպոզիտոր եւ անչափ բարի ու համեստ անձնավորություն, մաղթում քաջ առողջություն եւ հաջողություն բոլոր գործերում,- ասաց կազմակերպիչներից ԵրՊԼՀ-ի ուսանողուհի Անուշիկ Տեր-Ղուկասյանը: Համերգը բացեց ու եզրափակեց Էդգար Գյանջումյանը` կատարելով «Հույսի Աշուն» գործիքային ստեղծագործությունը և երկու երգ: Նրան ձայնակցեցին ԵրՊԼՀ-ի ուսանողները: -Այսօր այս երկու ժամը դարձան սեր, սպասումն այս օրվա և այս տրամադրությունը միշտ կմնան ինձ հետ: Ամբողջ կյանքի ընթացքում հիշվող պահեր եղան այսօր: Շնորհակալություն, շնորհավորում եմ ԵրՊԼՀ-ի 75 ամյակը: Այսօր կատարված շատ երգեր տասը տարի առաջ են գրվել: Հիշում եք, սիրում, կատարում եւ նվիրում մեզ, շնորհակալություն,- հուզվել էր Էդգար Գյանջումյանը: